🏠 વિરમગામ : વ્રજ વિહાર સોસાયટીમાં લોહિયાળ ખેલ: પત્ની અને પુત્રએ જ વેપારીને મોતને ઘાટ ઉતાર્યા, ‘અકસ્માત’નું નાટક પોલીસે ઉઘાડુ પાડ્યુ
વિરમગામ : કહેવાય છે કે ઘરના જ જ્યારે દુશ્મન બને ત્યારે બચવું મુશ્કેલ હોય છે. વિરમગામ શહેરમાં બનેલી એક હૃદયદ્રાવક ઘટનાએ સમગ્ર પંથકમાં ચકચાર મચાવી દીધી છે. વ્રજ વિહાર સોસાયટીમાં રહેતા સોની વેપારી દીપકભાઈ રાધનપુરાની હત્યા બીજું કોઈએ નહીં પણ તેમના જ ધર્મપત્ની અને લાડકવાયા પુત્રએ મળીને કરી હોવાનું બહાર આવ્યું છે.
🚑 વિરમગામ : શરૂઆતમાં ‘અકસ્માત’માં ખપાવવાનો થયો પ્રયાસ
ગઈ તા. ૦૬/૦૬/૨૦૨૬ ના રોજ વિરમગામની મહાત્મા ગાંધી હોસ્પિટલમાંથી પોલીસને ફોન આવ્યો કે દીપકભાઈ જયાંતીભાઈ રાધનપુરા (સોની) નામના વ્યક્તિનું મોત થયું છે. પરિવારજનોએ પોલીસ સમક્ષ એવી વાર્તા રજૂ કરી હતી કે દીપકભાઈ સીડી પરથી પડી ગયા હતા અને ઈજા થવાના કારણે તેમનું મૃત્યુ થયું હતું.
🔍 પોલીસની તીક્ષ્ણ નજર અને પોસ્ટમોર્ટમનો રિપોર્ટ
વિરમગામ ટાઉન પોલીસે જ્યારે તપાસ હાથ ધરી ત્યારે મેડિકલ ઓફિસરને દીપકભાઈના કપાળ પર ઉંડો ઘા અને શરીરના અન્ય ભાગો પર શંકાસ્પદ ઈજાઓ જોવા મળી હતી. લાશને ફોરેન્સિક પોસ્ટમોર્ટમ માટે અમદાવાદ મોકલવામાં આવી. પીએમ રિપોર્ટમાં જે ખુલાસો થયો તેણે પોલીસને પણ ચોંકાવી દીધી. રિપોર્ટમાં સ્પષ્ટ થયું કે દીપકભાઈનું મોત ગૂંગળામણને કારણે ગળું દબાવવાથી અને માથાના ભાગે થયેલી ગંભીર ઈજાઓને કારણે થયું હતું. આ અકસ્માત નહીં પણ એક સુનિયોજિત કાવાતરું હતું.
⚖️ પુત્રના વેપારનો વિવાદ અને પિતાનું મોત
પોલીસે જ્યારે દીપકભાઈની પત્ની દિવ્યાનીબેન (ઉ.વ. ૪૨) અને પુત્ર ઉદય (ઉ.વ. ૨૨) ની કડકાઈથી પૂછપરછ કરી ત્યારે સત્ય બહાર આવ્યું. મૃતક દીપકભાઈની ટાવર બજારમાં ‘અક્ષર જ્વેલર્સ’ નામની સોનાની દુકાન આવેલી છે. દીપકભાઈ તેમના નાના દીકરા ઉદયને વેપારમાં મદદ કરતા નહોતા, જેને લઈને ઘરમાં અવારનવાર ઝઘડા થતા હતા.
ઘટનાના દિવસે પણ આ બાબતે બોલાચાલી થઈ હતી. જેમાં માતા દિવ્યાનીબેને પુત્રનો પક્ષ લીધો હતો. ઝઘડો એટલો ઉગ્ર બન્યો કે માતા-પુત્રએ લાકડાના ધોકા વડે દીપકભાઈ પર હુમલો કર્યો. પુત્ર ઉદયે પિતાનું ગળું દબાવીને તેમને હંમેશા માટે શાંત કરી દીધા હતા.
🚔 પોલીસની કાર્યવાહી
વિરમગામ ટાઉન પોલીસે આ મામલે બી.એન.એસ. કલમ-૧૦૩(૧), ૫૪ મુજબ ગુનો નોંધીને બંને આરોપીઓ (માતા અને પુત્ર)ની ધરપકડ કરી લીધી છે. આ સમગ્ર ઓપરેશનમાં પીઆઈ એસ.એ. ગઢવી અને પીએસઆઈ એચ.કે. વાઘેલા સહિતની ટીમે પ્રશંસનીય કામગીરી કરી છે. હાલ પોલીસ આ કેસમાં અન્ય કોઈની સંડોવણી છે કે કેમ તે દિશામાં વધુ તપાસ કરી રહી છે.
