ઈરાન સરહદે અમેરિકી સેનાનો ખડકલો! 10,000 સૈનિકો યુદ્ધ માટે તૈયાર, ટ્રમ્પના “પ્લાન ઈરાન” થી દુનિયામાં ફફડાટ
વોશિંગ્ટન/તેહરાન: દુનિયા અત્યારે બીજા એક મોટા યુદ્ધના ઉંબરે ઉભી હોય તેમ લાગે છે. અમેરિકી રાષ્ટ્રપતિ ડોનાલ્ડ ટ્રમ્પે ઈરાન સામે સીધું રણશિંગુ ફૂંકતા એક સનસનાટીભર્યું નિવેદન આપ્યું છે. ટ્રમ્પે સ્પષ્ટ શબ્દોમાં કહ્યું છે કે તેઓ ઈરાનનું તેલ કબજે કરવા માંગે છે અને આ માટે ઈરાનનું સૌથી મહત્વનું ઓઈલ એક્સપોર્ટ હબ ‘ખાર્ગ આઇલેન્ડ’ (Kharg Island) અમેરિકાના નિશાના પર છે.
🚢 ટ્રમ્પ : શા માટે ખાર્ગ આઇલેન્ડ જ ટ્રમ્પના નિશાના પર છે?
ખાર્ગ આઇલેન્ડ ઈરાન માટે સોનાની લગડી સમાન છે, કારણ કે ઈરાનનું મોટાભાગનું તેલ અહીંથી જ દુનિયાભરમાં નિકાસ થાય છે. ટ્રમ્પનું માનવું છે કે જો આ આઇલેન્ડ પર કબજો કરી લેવામાં આવે, તો ઈરાનની આર્થિક કમર તૂટી જશે. ટ્રમ્પે એક ઇન્ટરવ્યુમાં જણાવ્યું હતું કે, “મારું મનપસંદ કામ ઈરાનનું તેલ લેવાનું છે… અમે ખાર્ગ આઇલેન્ડ કબજે કરી શકીએ છીએ, અમારી પાસે ઘણા વિકલ્પો છે”.
🎖️ 10,000 સૈનિકો યુદ્ધ માટે તૈયાર!
આ માત્ર નિવેદનબાજી નથી, પરંતુ જમીન પર પણ મોટી હલચલ જોવા મળી રહી છે. પેન્ટાગોને જમીન કબજે કરવા અને તેને જાળવી રાખવા માટે ખાસ તાલીમ પામેલા 10,000 સૈનિકોને તૈનાત કરવાનો આદેશ આપ્યો છે. જેમાંથી લગભગ 3,500 જવાનો અને મરીન્સ તો મિડલ ઈસ્ટમાં પહોંચી પણ ગયા છે. ટ્રમ્પનું કહેવું છે કે ખાર્ગ આઇલેન્ડ પાસે કોઈ મજબૂત સંરક્ષણ નથી અને અમેરિકા તેને ખૂબ જ સરળતાથી કબજે કરી શકે છે.
💸 દુનિયાભરમાં તેલના ભાવમાં ભડકો!
અમેરિકી રાષ્ટ્રપતિના આ નિવેદન અને વધતા તણાવને કારણે વૈશ્વિક બજારમાં ક્રૂડ ઓઈલના ભાવ આસમાને પહોંચ્યા છે. બ્રેન્ટ ક્રૂડની કિંમત પ્રતિ બેરલ $116 ને પાર કરી ગઈ છે, જે છેલ્લા એક મહિનામાં 50% કરતા પણ વધુનો વધારો દર્શાવે છે. જો આ યુદ્ધ લાંબુ ચાલશે તો સામાન્ય માણસના ખિસ્સા પર તેની ભારે અસર પડી શકે છે.
⏳ 6 એપ્રિલ સુધીનું અલ્ટીમેટમ
અમેરિકી રાષ્ટ્રપતિએ પાકિસ્તાની મધ્યસ્થીઓ દ્વારા ઈરાન સાથે પરોક્ષ વાતચીત પણ શરૂ કરી છે. જોકે, તેમણે ઈરાનને 6 એપ્રિલ સુધીનો સમય આપ્યો છે. જો ત્યાં સુધીમાં કોઈ સમજૂતી નહીં થાય, તો ઈરાનના એનર્જી ઈન્ફ્રાસ્ટ્રક્ચર પર અમેરિકી હુમલા નિશ્ચિત માનવામાં આવે છે. ટ્રમ્પે દાવો કર્યો છે કે અમેરિકા અત્યાર સુધીમાં 13,000 ટાર્ગેટ પર બોમ્બમારો કરી ચૂક્યું છે અને હજુ 3,000 ટાર્ગેટ બાકી છે.
👤 ઈરાનમાં સત્તા પલટો?
એક ચોંકાવનારો દાવો કરતા ટ્રમ્પે કહ્યું છે કે ઈરાનમાં હકીકતમાં ‘શાસન પરિવર્તન’ (Regime Change) થઈ ગયું છે. સુપ્રીમ લીડર આયાતુલ્લા ખામેનેઈના મૃત્યુ બાદ હવે નવી અને પ્રોફેશનલ ટીમ સાથે વાતચીત ચાલી રહી છે. એટલું જ નહીં, ટ્રમ્પે એવો પણ દાવો કર્યો છે કે ખામેનેઈનો પુત્ર મોજતબા ખામેનેઈ કદાચ મૃત્યુ પામ્યો છે અથવા અત્યંત ખરાબ હાલતમાં છે.
શું અમેરિકા ખરેખર ઈરાનના તેલ પર કબજો કરશે? કે પછી આ માત્ર દબાણ લાવવાની રણનીતિ છે? 6 એપ્રિલની તારીખ હવે આખી દુનિયા માટે મહત્વની બની રહેશે.
