પશ્ચિમ બંગાળ કોલકાતા: પશ્ચિમ બંગાળના રાજકારણમાં જેની ‘પુષ્પા’ તરીકે ધાક હતી, તેવા તૃણમૂલ કોંગ્રેસ (TMC) ના કદાવર નેતા અને અભિષેક બેનર્જીના નજીકના ગણાતા જહાંગીર ખાનની આખરે ધરપકડ કરવામાં આવી છે. સોમવારે વહેલી સવારે પશ્ચિમ બંગાળ પોલીસની સ્પેશિયલ ટાસ્ક ફોર્સ (STF) એ એક ગુપ્ત ઓપરેશન પાર પાડીને ભારત-નેપાળ સરહદ નજીકથી તેને ઝડપી પાડ્યો હતો.
🏃♂️ પશ્ચિમ બંગાળ : દેશ છોડી ભાગવાની ફિરાકમાં હતો જહાંગીર!
પશ્ચિમ બંગાળ : પોલીસ સૂત્રોના જણાવ્યા અનુસાર, જહાંગીર ખાન છેલ્લા કેટલાક અઠવાડિયાથી ફરાર હતો. તે નેપાળના રસ્તે ભારત છોડીને ભાગી જવાની પિરાકમાં હતો, પરંતુ તે સરહદ પાર કરે તે પહેલા જ STF ની ટીમે તેને દબોચી લીધો હતો. ધરપકડ બાદ તેને કાયદાકીય કાર્યવાહી માટે કોલકાતા લાવવામાં આવી રહ્યો છે.
🎬 ‘સિંઘમ’ સામે ‘પુષ્પા’નો પડકાર
પશ્ચિમ બંગાળ : જહાંગીર ખાન પોતાની વિવાદાસ્પદ શૈલી માટે જાણીતો છે. તેણે પોતાનું હુલામણું નામ ‘પુષ્પા’ રાખ્યું હતું. જ્યારે ચૂંટણી પંચના ઓબ્ઝર્વર અજય પાલ શર્માને ‘સિંઘમ’ તરીકે ઓળખવામાં આવ્યા, ત્યારે જહાંગીરે જાહેરમાં પડકાર ફેંક્યો હતો કે, “જો તે સિંઘમ છે, તો હું પુષ્પા છું”. જોકે, કાયદાના સિંઘમ સામે આખરે પુષ્પાએ ઝૂકવું પડ્યું છે.
🗳️ EVM સાથે છેડછાડ અને ગંભીર આરોપો
જહાંગીર ખાન સામે ફાલ્ટા પોલીસ સ્ટેશનમાં ઓછામાં ઓછી સાત FIR નોંધાયેલી છે. તેના પર આરોપ છે કે તેણે ફાલ્ટા વિધાનસભા બેઠકની ચૂંટણી દરમિયાન EVM મશીનો પર ભાજપના પ્રતીક પર ટેપ લગાવીને છેડછાડ કરી હતી અને મતદારોને ધમકાવ્યા હતા. આ ગંભીર ગેરરીતિઓને કારણે ચૂંટણી પંચે ફાલ્ટામાં ફરીથી મતદાન કરાવવાનો આદેશ આપવો પડ્યો હતો.
⚖️ હાઈકોર્ટમાંથી ન મળી રાહત
કલકત્તા હાઈકોર્ટે જહાંગીર ખાનની ધરપકડ સામેની વચગાળાની સુરક્ષા લંબાવવાનો ઈનકાર કરી દીધો હતો. અગાઉ તેને ૨૬ મે સુધી રાહત આપવામાં આવી હતી, પરંતુ કોર્ટે સુરક્ષા પાછી ખેંચી લેતા પોલીસ માટે તેની ધરપકડનો માર્ગ મોકળો થયો હતો.
📉 ચૂંટણીમાં કારમી હાર
પશ્ચિમ બંગાળ : ફાલ્ટા વિધાનસભાની પેટાચૂંટણીમાં જહાંગીર ખાને મતદાનના માત્ર ૪૮ કલાક પહેલા પોતાનું નામ પાછું ખેંચી લીધું હતું. તેમ છતાં તેનું નામ EVM માં હતું, જ્યાં તેને માત્ર ૭,૭૮૩ મતો મળ્યા અને તે ચોથા ક્રમે રહ્યો હતો. ભાજપના ઉમેદવાર દેવાંશુ પાંડાએ આ બેઠક ૧.૦૯ લાખથી વધુ મતોની જંગી સરસાઈથી જીતી લીધી હતી.
હાલમાં પોલીસ જહાંગીર ખાનની સઘન પૂછપરછ કરી રહી છે અને આ ધરપકડથી બંગાળના રાજકારણમાં ફરી ગરમાવો આવી ગયો છે.
ખાડીયુદ્ધ : તેહરાનથી તેલ અવીવ સુધી મિસાઈલનો વરસાદ: મધ્ય પૂર્વમાં મહાયુદ્ધના ભણકારા
