અમદાવાદ: રિક્ષામાં મુસાફરી કરતા પેસેન્જરો માટે લાલબત્તી સમાન કિસ્સો, મહિલાઓ અને સિનિયર સિટીઝન્સને ટાર્ગેટ કરતી ગેંગ ઝડપાઈ
અમદાવાદ : શહેરમાં છેલ્લા કેટલાક સમયથી ઓટોરિક્ષામાં મુસાફરી કરતા સિનિયર સિટીઝન્સ અને મહિલાઓને શિકાર બનાવતી એક રીઢા ગુનેગારોની ટોળકી સક્રિય થઈ હતી. આ ગેંગ મુસાફરોની નજર ચૂકવી તેમના કિંમતી દાગીના અને રોકડ રકમ ચોરી કરી લેતી હતી. જોકે, અમદાવાદ શહેર ક્રાઈમ બ્રાન્ચે આ ગેંગના ત્રણ સાગરીતોને ₹2.87 લાખના મુદ્દામાલ સાથે ઝડપી પાડી જેલના સળિયા પાછળ ધકેલી દીધા છે.
📍 અમદાવાદ : કઈ રીતે ખેલ પાડતી હતી ‘ચાચા’ની ગેંગ?
અમદાવાદ : આ ગેંગની મોડસ ઓપરેન્ડી (ચોરી કરવાની રીત) જાણીને તમે પણ ચોંકી જશો. આ શખ્સો પોલીસ કે સીસીટીવીથી બચવા માટે રિક્ષાની નંબર પ્લેટ દૂર કરી દેતા હતા.
ત્યારબાદ મહિલાઓ કે વૃદ્ધોને પેસેન્જર તરીકે બેસાડી, રસ્તામાં અન્ય પેસેન્જરને ઉતારવાના બહાને ભોગ બનનાર વ્યક્તિને અધવચ્ચે ઉતારી દેતા હતા. પેસેન્જર જ્યારે ઘરે પહોંચે ત્યારે તેમને ખબર પડતી કે તેમની બેગમાંથી સોનાના ઘરેણાં કે રોકડ રકમ ગાયબ છે.
📦 મુદ્દામાલ અને આરોપીઓની ધરપકડ ક્રાઈમ બ્રાન્ચે દાણીલીમડા વિસ્તારમાંથી ત્રણ આરોપીઓની ધરપકડ કરી છે:
- મોહમદ યુનુસ ઉર્ફે ચાચા (ઉં.વ. 47) – જેની સામે અગાઉ પણ અનેક ચોરી અને પાસા (PASA) હેઠળ ગુના નોંધાયેલા છે.
- સકીલ સલીમભાઈ અંસારી (ઉં.વ. 38).
- અરબાઝ ફિરોઝભાઈ શેખ (ઉં.વ. 26).
પોલીસે આ ગેંગ પાસેથી ₹1,93,000 ની કિંમતના સોનાની ચેઈન, વીંટી અને પેન્ડલ તેમજ ₹14,500 રોકડા અને ગુનામાં વપરાયેલી ₹80,000 ની રિક્ષા મળી કુલ ₹2,87,500 નો મુદ્દામાલ જપ્ત કર્યો છે.
🔍 તાજો કિસ્સો: ચાંદખેડાની મહિલા બની હતી ભોગ
ગત તા. 03/06/2026 ના રોજ એક મહિલા ચાંદખેડાથી કલોલ જવા રિક્ષામાં બેઠા હતા. રિક્ષાચાલકે તેમને અડાલજ પાસે ગેબનશાહપીરની દરગાહ નજીક ઉતારી દીધા અને તે પરત આવ્યો જ નહીં. બાદમાં મહિલાએ કલોલ સ્થિત ઘરે પહોંચી તપાસ કરતા સોનાના ઘરેણાં ચોરાયા હોવાની જાણ થઈ હતી, જે બાદ કલોલ શહેર પોલીસ સ્ટેશનમાં ફરિયાદ નોંધાવવામાં આવી હતી.
હાલ ક્રાઈમ બ્રાન્ચે આ તમામ આરોપીઓને ગાંધીનગર જિલ્લાના કલોલ શહેર પોલીસ સ્ટેશન સોંપવાની તજવીજ હાથ ધરી છે.
